عدالت کو گالی دینے کی جرات کیسے ہوئی؟ چیف جسٹس نے نہال ہاشمی کو جھاڑ پلا دی

0
436

اسلام آباد: مسلم لیگ ن کے سابق سینیٹر نہال ہاشمی کے خلاف توہین عدالت کیس کی سماعت کی دوران چیف جسٹس میاں ثاقب نثار نے سخت برہمی کا اظہار کرتے ہوئے کہا کہ عدالت کو گالی دینے کی جرات کیسے ہوئی؟ عدالت نے سندھ ، پاکستان بار کونسل اور صدر سپریم کورٹ بار کو نوٹس جاری کردیا۔

تفصیلات کے مطابق سپریم کورٹ میں مسلم لیگ ن کے سابق سینیٹر نہال ہاشمی کے خلاف توہین عدالت کیس کی سماعت ہوئی۔

چیف جسٹس میاں ثاقب نثار نے ریمارکس دیتے ہوئے کہا کہ آپ نے توہین عدالت کی اور عدالت کو گالیاں دیں۔ اپنے لیے بھی وہی الفاظ دہرائیں جو عدالت کے لیے استعمال کیے۔

عدالت میں نہال ہاشمی کی گفتگو دوبارہ چلائی گئی جس کے بعد چیف جسٹس نے استفسار کیا کہ رشید اے رضوی صاحب آپ بتائیں یہ آپ کا بھی امتحان ہے جس پر رشید رضوی کا کہنا تھا کہ اس بات کا دفاع کسی صورت نہیں کیا جاسکتا۔

چیف جسٹس نے نہال ہاشمی پر برہمی کا اظہار کرتے ہوئے کہا کہ تمہاری جرات کیسے ہوئی عدالت کو گالی دینے کی۔ نہال ہاشمی نے جواباً کہا کہ وہ باوضو ہیں، کلمہ بھی پڑھا اور کہا یہ انہوں نے عدالت کو نہیں کہا۔

چیف جسٹس نے کہا کہ یہ الفاظ استعمال کیے آپ کو شرم نہں آتی۔ دل کی تکلیف کا جھوٹ بول کر اسپتال میں لیٹے رہے۔

چیف جسٹس نے ریمارکس دیے کہ بار کو چاہیئے تھا فوراً ایکشن لیتے، کیا نہال ہاشمی بار کا نمائندہ رہ سکتا ہے؟ عدالت نے سندھ بار کونسل، پاکستان بار کونسل اور صدر سپریم کورٹ بار کو نوٹس جاری کرتے ہوئے کیس کی سماعت کل تک ملتوی کر دی۔

یاد رہے کہ گزشتہ برس کراچی میں ایک تقریر کے دوران نہال ہاشمی نے پاناما کیس کی تحقیقات کرنے والی مشترکہ تحقیقاتی ٹیم کے ارکان کو شدید تنقید کا نشانہ بناتے ہوئے کہا تھا کہ حساب لینے والوں، سن لو تم کل ریٹائر ہوجاؤ گے، ہم تمہارے خاندان کے لیے زمین تنگ کردیں گے۔

نہال ہاشمی کی توہین آمیز تقریر کے بعد انہیں توہین عدالت کے جرم میں ایک ماہ کی سزا سنادی گئی تھی تاہم رہائی کے بعد انہوں نے ایک بار پھر سخت زبان استعمال کرتے ہوئے عدلیہ مخالف الفاظ کہے تھے جس کا چیف جسٹس نے پھر نوٹس لیتے ہوئے انہیں عدالت طلب کرلیا تھا۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔

The post عدالت کو گالی دینے کی جرات کیسے ہوئی؟ چیف جسٹس نے نہال ہاشمی کو جھاڑ پلا دی appeared first on ARYNews.tv | Urdu – Har Lamha Bakhabar.